លោក ជូ សេរីយា អនុប្រធានមន្ទីរ តំណាងលោក ង៉ែត​ ឡឹង ប្រធានមន្ទីរអប់រំ យុវជន និងកីឡា ខេត្តកោះកុង លោកប្រធាន អនុប្រធានការិយាល័យយុវជន និងកីឡាបានទទួលជួបក្រុមការងារសមាគមល្បុក្កតោកម្ពុជា នៅការិយាល័យធ្វើការលោកអនុប្រធានមន្ទីរ នៃមន្ទីរអប់រំ យុវជន និងកីឡាខេត្ត ដើម្បីជួបពិភាក្សាលើកិច្ចការគ្រោងបើកសមាគមល្បុក្កតោនៅតាមគ្រឹះស្ថានសិក្សាគ្រប់កម្រិតថ្នាក់(បឋមសិក្សា និងមធ្យមសិក្សា)ទូទាំងខេត្តកោះកុង។ ក្រុមប្រតិភូសមាគមបានជម្រាបថ្នាក់ដឹកនាំមន្ទីរ ពីគោលបំណងនៃការបង្កើតសមាគមនៅតាមគ្រឹះស្ថានសិក្សានេះដើម្បីលើកស្ទួយវិស័យកីឡាពិសេសចូលរួមអភិរក្សកេរតំណែលក្បាច់គុនបុព្វបុរសដូនតាខ្មែរយើងផង ដើម្បីកុលបុត្រកុលធីតាខ្មែរមានសុខុមាលភាពល្អ មានជីវភាពរស់នៅល្អ មានសាមគ្គីភាពប្រកបដោយបរិយាបន្ន ស្របតាមខ្លឹមសារផ្សព្វផ្សាយរបស់ក្រសួងអប់រំ យុវជន និងកីឡា " ប្រជាជនម្នាក់លេងកីឡាមួយប្រភេទយ៉ាងតិចប្រចាំជីវិត " ដើម្បីឆ្ពោះទៅស៊ីហ្គេមលើកទី៣២ដែលព្រះរាជាណាចក្រកម្ពុជានៃយើងនឹងទទួលធ្វើជាម្ចាស់ផ្ទះឆ្នាំ២០២៣ ដ៏ខ្លីខាងមុខនេះ។ ជំនួសមុខឱ្យថ្នាក់ដឹកនាំមន្ទីរ ក៏ដូចជាសិស្សានុសិស្ស លោកគ្រូ អ្នកគ្រូ និងប្រជាពលរដ្ឋក្នុងខេត្រកោះកុង លោក ជូ សេរីយា បានសម្ដែងនូវសេចក្ដីរំភើបរីករាយ សង្ឃឹមយ៉ាងមុតមាំថាសមាគមល្បុក្កតោនឹងលេចចេញជារូបរាងតាមគ្រប់គ្រឹះស្ថានសិក្សាក្នុងខេត្តឆាប់ៗ និងថ្លែងអំណរដល់ក្រុមការងារប្រតិភូសមាគមល្បុក្កតោកម្ពុជាដែលបានសម្រេចបង្កើតសមាគមនេះក្នុងខេត្តកោះកុង ។ទន្ទឹមនឹងនោះ លោកអនុប្រធានមន្ទីរគោរពជូនពរដល់ក្រុមប្រតិភូស្នាក់នៅក្មុងខេត្រ និងធ្វើមាតុភូមិនិវត្តន៍ទៅគេហដ្ឋានវិញប្រកបដោយសុខសុវត្ថិភាព ពិសេសសូមក្រុមការងារ និងក្រុមគ្រួសារចៀសផុតពីឆ្លងជំងឺកូវីដ-១៩។(អត្ថបទ ៖ ហង់ សុវណ្ណ)