លោក ឯក ម៉ឹង ប្រធានក្រុមប្រឹក្សាស្រុកកោះកុង ដឹកនាំលោក លោកស្រីសមាជិកក្រុមប្រឹក្សាស្រុក និងមន្រ្តីរាជការនៃរដ្ឋបាលស្រុកកោះកុង ជួបសំណេះសំណាលសួរសុខទុក្ខលោក ពុទ្ធិ សែន សមាជិកក្រុមប្រឹក្សាស្រុកកោះកុង
ស្រុកកោះកុង ៖ នៅព្រឹកថ្ងៃសៅរ៍ ៤ កើត ខែមាឃ ឆ្នាំឆ្លូវត្រីស័ក ពុទ្ធសករាជ ២៥៦៥ ត្រូវនឹងថ្ងៃទី៥ ខែកុម្ភៈ ឆ្នាំ២០២២ លោក ឯក ម៉ឹង ប្រធានក្រុមប្រឹក្សាស្រុកកោះកុង បានដឹកនាំលោក លោកស្រីសមាជិកក្រុមប្រឹក្សាស្រុក គណៈអភិបាលស្រុក នាយករងរដ្ឋបាលសាលាស្រុក ប្រធាន អនុប្រធាន និងមន្រ្តីការិយាល័យ អង្គភាពចំណុះរដ្ឋបាលស្រុកកោះកុង អញ្ជើញជួបសំណេះសំណាល សួរសុខទុក្ខលោក ពុទ្ធិ សែន សមាជិកក្រុមប្រឹក្សាស្រុកកោះកុង ដែលបានជួបគ្រោះថ្នាក់ចរាចរកាលពីខែមករា ដែលបណ្តាលឱ្យមានរងរបួសបាក់ដងកាំបិតស្មាខាងឆ្វេង និងបានកំពុងសំរាកព្យាបាលជំងឺនៅគេហដ្ឋានរបស់លោក ស្ថិតនៅភូមិកោះស្រឡៅ ឃុំកោះកាពិ ស្រុកកោះកុង ខេត្តកោះកុង។
ទន្ទឹមជាមួយគ្នានោះ លោកប្រធាន និងក្រុមការងារបាននាំយកថវិកាចំនួន ១ ៤៤០ ០០០រៀល(មួយលាន សែសិបបួនម៉ឺនរៀល) ដែលជាថវិការបស់មន្រ្តីរាជការនៃរដ្ឋបាលស្រុក និងសប្បុរសជនប្រគល់ជូនលោក ពុទ្ធិ សែន ព្រមទាំងនាំយកនូវសម្ភារប្រើប្រាស់ដែលជាអំណោយរបស់ ឯកឧត្តម ហ៊ុន ម៉ាណែត និងលោកជំទាវ ពេជ្រ ចន្ទមុនី ដោយក្នុងមួយគ្រួសារទទួលបានអង្ករចំនួន ២៥គីឡូក្រាម ទឹកសុីអុីវ ១យួរ ទឹកសុទ្ធ ១កេស ទឹកត្រី ២ដប មី ១កេស និងថ្នាំពេទ្យមួយចំនួនទៀត ប្រគល់ជូនផងដែរ។
