រដ្ឋបាលខេត្តកោះកុង

ស្រុកកោះកុង ៖ នៅព្រឹកថ្ងៃពុធ ៨ កើត ខែមាឃ ឆ្នាំឆ្លូវ​ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី៩ ខែកុម្ភៈ ឆ្នាំ២០២២ លោក សុខ ភិរម្យ អភិបាលរងស្រុក​ តំណាងលោក ជា សូវី អភិបាល នៃគណៈអភិបាល​កោះកុង​ បានដឹកនាំកិច្ចប្រជុំពិភាក្សាលើបញ្ហា បង្គោលអគ្គីសនី ដែលប៉ះពាល់ជាមួយគម្រោងលើកកម្រិតគុណភាពផ្លូវជាតិលេខ៤៨

ដើម្បីពិភាក្សាលើការងាររៀបចំធ្វើការសហការលើការអនុវត្តការងាររវាងអង្គភាពពាក់ព័ន្ធជាមួយរដ្ឋបាលស្រុក លើគម្រោងស្ថាបនាស្ថិតក្នុងដែន​សមត្ថកិច្ច​របស់ស្រុកកោះកុង ដើម្បីបង្កលក្ខណៈងាយស្រួលដល់ក្រុមការងារ ជាពិសេសការប៉ះពាល់លើ​ផងប្រយោជន៍របស់ប្រជាពលរដ្ឋ។​

ក្នុងកិច្ចប្រជុំនេះផងដែរ លោកអភិបាលរងស្រុក ក៏បានផ្ដល់ជាយោបល់ឱ្យមន្ទីររ៉ែ និងថាមពល ធ្វើការសហការជាមួយមន្ទីរសាធារណការនិងដឹកជញ្ជូនខេត្ត ពិនិត្យ និងសម្របសម្រួលជាមួយក្រុមហ៊ុនចំពោះមុខទាំង២(អគ្គីសនីកម្ពុជា និងក្រុមហ៊ុនសាងសង់ផ្លូវ) ចុះពិនិត្យទីតាំងបង្គោលដែលប៉ះពាល់គម្រោង រួចរាយការណ៍ជូនក្រុមការងារ និងអនុវត្តការផ្លាស់ប្ដូរទីតាំងបង្គោល ប្រកបដោយលក្ខណៈបច្ចេកទេស និងធ្វើយ៉ាងណា កាត់បន្ថយការប៉ះពាល់ផលប្រយោជន៍ប្រជាពលរដ្ឋឱ្យបានច្រើន ពិសេសការផ្ដាច់ចរន្តអគ្គីសនីក្នុងរយៈពេលខ្លីបំផុត

ជំនួសមុខឱ្យ លោកអភិបាល នៃគណៈអភិបាល​ស្រុកកោះកុង លោកអភិបាលរងស្រុក ក៏ផ្ដាំផ្ញើឱ្យក្រុមការងារទាំងអស់រក្សាសាមគ្គីភាព និងសហការគ្នាជានិច្ច ជាពិសេសសម្របសម្រួលលើកិច្ចចាំបាច់នានាចំពោះមុខ ហើយរដ្ឋបាលស្រុកនឹងចូលរួមសហការផងដែរ

កិច្ចប្រជុំនោះ ក៏មានការចូលរួមពីលោក ណឹម ភិរម្យ អភិបាលរងស្រុក តំណាងមន្ទីររ៉ែ និងថាមពលខេត្ត មន្ទីរសាធារណការនិងដឹកជញ្ជូនខេត្ត តំណាងក្រុមហ៊ុនអគ្គីសនីកម្ពុជា តំណាងក្រុមហ៊ុនសាងសង់ផ្លូវ៤៨ កំណាត់ទី២ ពីចំណុច61+200 ដល់ 125.000 នៅសាលប្រជុំសាលាស្រុកកោះកុង។