ក្រុមប្រឹក្សាអាណត្តិទី៥ ឃុំត្រពាំងរូង ស្រុកកោះកុង ខេត្តកោះកុង ឆ្នាំ២០២២

ក្រុមប្រឹក្សាឃុំ សង្កាត់ មានតួនាទីជំរុញ និងគាំពារអភិបាល សម្រាប់បំពេញសេចក្តីត្រូវការជាមូលដ្ឋាន ក្នុងឃុំសង្កាត់របស់ខ្លួនបម្រើផលប្រយោជន៍រួមរបស់ប្រជាពលរដ្ឋ ស្របតាមច្បាប់ស្តីពីការ គ្រប់គ្រងរដ្ឋបាលឃុំ សង្កាត់។

១ -តួនាទីបម្រើកិច្ចការមូលដ្ឋាន :
-ធានារក្សាសន្តិសុខ សណ្ដាប់ធ្នាប់របៀបរៀបរយសាធារណៈ។
-រៀបចំចាត់ចែងសេវាសាធារណៈចាំបាច់ និងមើលការខុសត្រូវឱ្យកិច្ចការទាំងនោះដំណើរការបានល្អ
-លើកទឹកចិត្តឱ្យមានការបង្កើនផាសុកភាព និងសុខុមាលភាពរបស់ប្រជាពលរដ្ឋ ជំរុញកិច្ចអភិវឌ្ឍន៍សេដ្ឋកិច្ច សង្គមកិច្ច និងលើកកម្ពស់ជីវភាពរស់នៅ របស់ប្រជាពលរដ្ឋ។
-ការពារ ថែរក្សាបរិស្ថាន ធនធានធម្មជាតិ វប្បធម៌ បេតិកភណ្ឌជាតិ។
-សម្របសម្រួលទស្សនៈ របស់ប្រជាពលរដ្ឋ ដើម្បីឱ្យមានការយោគយល់អធ្យាស្រ័យទៅវិញទៅមក
-បំពេញកិច្ចការជាទូទៅ ដើម្បីឆ្លើយតបសេចក្តីត្រូវការរបស់ប្រជាពលរដ្ឋ។

២-តួនាទីជាភ្នាក់ងារតំណាងរដ្ឋ
-រដ្ឋបាលឃុំ សង្កាត់មានភារកិច្ចអនុវត្តទៅតាមច្បាប់ព្រះរាជក្រឹត្យ អនុក្រឹត្យប្រាស និងលិខិតបទដ្ឋានពាក់ព័ន្ធ។
-ក្រុមប្រឹក្សាឃុំ សង្កាត់ត្រូវធានាផ្សព្វផ្សាយព័ត៌មានឱ្យបានទៀងទាត់ ដល់ប្រជាពលរដ្ឋ ក្នុងឃុំ សង្កាត់ អំពីបញ្ហាទាំងឡាយស្របតាមសមត្ថកិច្ចរបស់ខ្លួន និងអំពីសេចក្តីសម្រេច នៃកិច្ចប្រជុំរបស់ក្រុមប្រឹក្សាឃុំ សង្កាត់។

៣-តួនាទី និងភារកិច្ចរបស់ប្រជាពលរដ្ឋ ដើម្បីលើកកម្ពស់ជីវភាពរស់នៅរបស់ខ្លួន និងរួមចំណែកក្នុងការកសាងប្រទេសជាតិឱ្យរីកចម្រើន រុងរឿងប្រជាពលរដ្ឋគ្រប់រូបក្នុងមូលដ្ឋានត្រូវមានកាតព្វកិច្ចចូលរួមក្នុងការ ងារសំខាន់ៗរបស់ ឃុំ សង្កាត់ដូចជា :
-ប្រជាពលរដ្ឋមានសិទ្ធិចូលរួមស្តាប់កិច្ចប្រជុំសាធារណៈរបស់ក្រុមប្រឹក្សាឃុំ ប៉ុន្តែពុំមានសិទ្ធិអនុម័តបានទេ។
-ប្រជាពលរដ្ឋអាចលើកសំណួរ ដល់មេឃុំ ចៅសង្កាត់ ឬសមាជិកក្រុមប្រឹក្សា នៅក្នុងកិច្ចប្រជុំរបស់ក្រុមប្រឹក្សាឃុំ សង្កាត់ ដោយអនុលោមទៅតាមបទបញ្ជាផ្ទៃក្នុង សម្រាប់កិច្ចប្រជុំ ក្រុមប្រឹក្សាឃុំ សង្កាត់។
-ប្រពលរដ្ឋមានសិទ្ធិលើកសំណើ ឬធ្វើការប្តឹងតវ៉ាជាលាយលក្ខណ៍អក្សរ ឬផ្ទាល់មាត់ ដល់ក្រុមប្រឹក្សាឃុំ សង្កាត់ ហើយក្រុមប្រឹក្សាឃុំ សង្កាត់ត្រូវឆ្លើយតបនឹងសំណើ ឬការប្តឹងនោះជាកំហិត។
-ចំពោះសំណើ ឬការប្តឹងតវ៉ាទាំងឡាយណា ដែលមេឃុំ ចៅសង្កាត់មិនអាចដោះស្រាយបាន ក្នុងសមត្ថកិច្ចរបស់ខ្លួន មេឃុំចៅ សង្កាត់ត្រូវដាក់ក្នុងរបៀបវារៈអង្គប្រជុំបន្ទាប់ របស់ក្រុមប្រឹក្សាឃុំ សង្កាត់។
-មេឃុំ ចៅសង្កាត់ត្រូវជូនព័ត៌មាន ដល់ប្រជាពលរដ្ឋអំពីការដោះស្រាយរបស់ក្រុមប្រឹក្សាឃុំ សង្កាត់។
-ប្រជាពលរដ្ឋមានសិទ្ធិ និងនូវព័ត៌មានទាំងឡាយដែលទាក់ទងទៅនឹងការងារអភិវឌ្ឍន៍ភូមិ ឃុំ៕
ថ្ងៃពុធ ៥ កើត ខែភទ្របទ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៣១ ខែសីហា ឆ្នាំ២០២២ August 31, 2022