លោក សុខ សុទ្ធី អភិបាលរង នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំ ជាមួយក្រុមហ៊ុន អ៊ីលស៊ុង-ហានីលយ៉ញ វេនណ័រ ឯ.ក (ក្រុមហ៊ុនអនុវត្តគម្រោង លើកកម្រិតគុណភាពផ្លូវជាតិលេខ៤៨) មន្ទីរជំនាញ និងតំណាងក្រុមហ៊ុនពាក់ព័ន្ធ។
កិច្ចប្រជុំរៀបចំឡើងក្នុងគោលបំណងពិភាក្សាអំពីសំណើសុំឈូសឆាយសម្អាតដើមឈើស្ថិតនៅតាមបណ្ដោយផ្លូវជាតិលេខ ៤៨ ចាប់ពីគីឡូម៉ែត្រលេខ ១៤២+៦០០ ដល់ចំណុចគីឡូម៉ែត្រលេខ ១៤៨+០៣៨ និងស្នើសូមគោលការណ៍ ណែនាំអំពីការទុកដាក់កំណាត់ឈើដែលបានកាប់រំលំរួច។
ពាក់ព័ន្ធនឹងការស្នើសូមនេះ រដ្ឋបាលខេត្ត បានសម្រេច ៖
១.ក្រុមហ៊ុនស្ថាបនាផ្លូវ ត្រូវសហការ ជាមួយមន្ទីរកសិកម្ម រុក្ខាប្រមាញ់ និងនេសាទ ក្នុងការកាត់ឈើ និងយកកំណាត់ឈើទាំងនោះទៅរក្សាទុកនៅដីរបស់មន្ទីរកសិកម្ម
២.ពាក់ព័ន្ធរឿងបង្គោលភ្លើងអគ្គិសនី និងទុយោទឹក សូមឱ្យក្រុមហ៊ុនសហការ ជាមួយមន្ទីររ៉ែ និងថាមពល និងមន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានវត្តន៍ ដើម្បីដោះស្រាយ ធ្វើយ៉ាងណាមិនឱ្យរងផលប៉ះពាល់ដល់ការប្រើប្រាស់ភ្លើង និងទឹកស្អាតរបស់ប្រជាពលរដ្ឋឡើយ៕
ថ្ងៃព្រហស្បតិ៍ ១៥ កើត ខែមិគសិរ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៨ ខែធ្នូ ឆ្នាំ២០២២ ថ្ងៃនេះ ជាថ្ងៃសីល និងពេញបូណ៌មី December 8, 2022