រដ្ឋបាលខេត្តកោះកុង

Koh Kong Provincial Administration
ស្វែងរក

អំណោយមនុស្សធម៌ ជូនដល់ស្រ្តីកម្មការនីរោងចក្រដែលទើប នឹងសម្រាលកូន ចំនួន០៣ គ្រួសាររស់នៅសង្កាត់ស្មាច់មានជ័យ ០២គ្រួសារ និងសង្កាត់ដងទង់០១គ្រួសារ ក្រុងខេមរភូមិន្ទ

លោកជំទាវ មិថុនា ភូថង ប្រធានគណៈកម្មាធិការសាខាកាកបាទក្រហមកម្ពុជាខេត្តកោះកុង បានចាត់អោយលោក ឈួន យ៉ាដា នាយកសាខា សហការជាមួយអាជ្ញាធរមូលដ្ឋាន អញ្ជើញចុះសួរសុខទុក្ខ និងនាំយកអំណោយមនុស្សធម៌ ជូនដល់ស្រ្តីកម្មការនីរោងចក្រដែលទើប នឹងសម្រាលកូន ចំនួន០៣ គ្រួសាររស់នៅសង្កាត់ស្មាច់មានជ័យ ០២គ្រួសារ និងសង្កាត់ដងទង់០១គ្រួសារ ក្រុងខេមរភូមិន្ទ ខេត្តកោះកុង ។

ក្នុងឱកាសនោះដែរ លោកនាយកសាខាបានពាំនាំនូវប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពីសំណាក់ លោកជំទាវប្រធាន ឯកឧត្តមប្រធានកិត្តិយសសាខា ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចតែតែងគិតគូរពីសុខទុក្ខរបស់បងប្អូនប្រជាពលរដ្ឋងាយរងគ្រោះ និងរងគ្រោះដោយសារគ្រោះមហន្តរាយផ្សេងៗ ពិសេសស្រ្តី និងកុមារ ៖
១-សូមអញ្ជើញទៅពិនិត្យសុខភាព ក្រោយសម្រាលទាំងមាតា និងទារក និងទទួលថ្នាំបង្ការជម្ងឺ១១មុខ តាមការកំណត់ របស់គ្រូពេទ្យ ។
២-សូមបំបៅទឹកដោះម្តាយតែមួយមុខគត់ ចាប់ពីពេលទារកប្រសូតភ្លាម រហូតដល់ទរាកអាយុបាន ៦ ខែនិងផ្តល់អាហារគ្រប់មុខ គ្រប់ជីវជាតិ (បបរខាប់គ្រប់គ្រឿង) រួមជាមួយការបន្តបំបៅកូនដោយទឹកដោះម្តាយ រហូតដល់កុមារមានអាយុ យ៉ាងតិច ២ឆ្នាំ។
៣-សូមប្រញាប់យកទារកទៅមន្ទីរពេទ្យភ្លាម នៅពេលឃើញសញ្ញាគ្រោះថ្នាក់ ណាមួយនៃជម្ងឺរលាកផ្លូវដង្ហើម ជម្ងឺរាក និងជម្ងឺឆ្លងដ៏ទៃទៀត និងយកទារក ឬកុមារដែលមានរាងកាយស្គម ឬមិនឡើងទម្ងន់សោះ ទៅពិគ្រោះយោបល់ និងទទួលយកការព្យាបាលនៅមន្ទីរពេទ្យ ។

អំណោយមនុស្សធម៌ដែលបានផ្តល់ជូននាពេលនោះក្នុងម្នាក់ៗ ទទួលបាន ៖អង្ករ២៥គក្រ ទឹកដោះគោឆៅ១ឡូ ទឹកផ្លែឈើ (Green tea) ១០កំប៉ុង ទឹកដោះគោខាប់៣កំប៉ុង សាប៊ូ ម្សៅកូនក្មេង២ដប អាវយឺត២ ថ្នាំបាញ់មូស១កំប៉ុង ធូបមូស១ប្រអប់ ខោទឹកនោមកូនក្មេង៥ខោ ឃីតទារក(កម្រាលដេក ខោ អាវ មួក)០១ឈុត ព្រមទាំងថវិកា ៨ម៉ឺនរៀល ដូចៗគ្នា៕

អត្ថបទទាក់ទង